Vishnu Sahasranama

Opening

नारायणं नमस्कृत्य नरं चैव नरोत्तमम् ।
देवीं सरस्वतीं व्यासं ततो जयमुदीरयेत् ॥

Naaraayanam namaskritya naram chaiva narottamam
Deveem sarasvateem vyaasam tato jayamudeerayet

Verse 1

शुक्लाम्बरधरं विष्णुं शशिवर्णं चतुर्भुजम् ।
प्रसन्नवदनं ध्यायेत् सर्वविघ्नोपशान्तये ॥ १॥

Shuklaambaradharam vishnum shashivarnam chaturbhujam
Prasannavadanam dhyaayet sarvavighnopashaantaye

Verse 2

यस्य द्विरदवक्त्राद्याः पारिषद्याः परः शतम् ।
विघ्नं निघ्नन्ति सततं विष्वक्सेनं तमाश्रये ॥ २॥

Yasya dviradavaktraadyaah paarishadyaah parah shatam
Vighnam nighnanti satatam vishvaksenam tamaashraye

Verse 3

व्यासं वसिष्ठनप्तारं शक्तेः पौत्रमकल्मषम् ।
पराशरात्मजं वन्दे शुकतातं तपोनिधिम् ॥ ३॥

Vyaasam vasishthanaptaaram shakteh pautramakalmasham
Paraasharaatmajam vande shukataatam taponidhim

Verse 4

व्यासाय विष्णुरूपाय व्यासरूपाय विष्णवे ।
नमो वै ब्रह्मनिधये वासिष्ठाय नमो नमः ॥ ४॥

Vyaasaaya vishnuroopaaya vyaasaroopaaya vishnave
Namo vai brahmanidhaye vaasishthaaya namo namah

Verse 5

अविकाराय शुद्धाय नित्याय परमात्मने ।
सदैकरूपरूपाय विष्णवे सर्वजिष्णवे ॥ ५॥

Avikaaraaya shuddhaaya nityaaya paramaatmane
Sadaikarooparoopaaya vishnave sarvajishnave

Verse 6

यस्य स्मरणमात्रेण जन्मसंसारबन्धनात् ।
विमुच्यते नमस्तस्मै विष्णवे प्रभविष्णवे ॥ ६॥

Yasya smaranamaatrena janmasansaarabandhanaat
Vimuchyate namastasmai vishnave prabhavishnave

Verse 7

श्रीवैशम्पायन उवाच
श्रुत्वा धर्मानशेषेण पावनानि च सर्वशः ।
युधिष्ठिरः शान्तनवं पुनरेवाभ्यभाषत ॥ ७॥

Shreevaishampaayana uvaacha
Shrutvaa dharmaanasheshena paavanaani cha sarvashah
Yudhishthirah shaantanavam punarevaabhyabhaashata

Verse 8

युधिष्ठिर उवाच
किमेकं दैवतं लोके किं वाप्येकं परायणम् ।
स्तुवन्तः कं कमर्चन्तः प्राप्नुयुर्मानवाः शुभम् ॥ ८॥

Yudhishthira uvaacha
Kimekam daivatam loke kim vaapyekam paraayanam
Stuvantah kam kamarchantah praapnuyurmaanavaah shubham

Verse 9

को धर्मः सर्वधर्माणां भवतः परमो मतः ।
किं जपन्मुच्यते जन्तुर्जन्मसंसारबन्धनात् ॥ ९॥

Ko dharmah sarvadharmaanaam bhavatah paramo matah
Kim japanmuchyate janturjanmasansaarabandhanaat

Verse 10

भीष्म उवाच
जगत्प्रभुं देवदेवमनन्तं पुरुषोत्तमम् ।
स्तुवन् नामसहस्रेण पुरुषः सततोत्थितः ॥ १०॥

Bheeshma uvaacha
Jagatprabhum devadevamanantam purushottamam
Stuvan naamasahasrena purushah satatotthitah

Verse 11

तमेव चार्चयन्नित्यं भक्त्या पुरुषमव्ययम् ।
ध्यायन् स्तुवन् नमस्यंश्च यजमानस्तमेव च ॥ ११॥

Tameva chaarchayannityam bhaktyaa purushamavyayam
Dhyaayan stuvan namasyanshcha yajamaanastameva cha

Verse 12

अनादिनिधनं विष्णुं सर्वलोकमहेश्वरम् ।
लोकाध्यक्षं स्तुवन्नित्यं सर्वदुःखातिगो भवेत् ॥ १२॥

Anaadinidhanam vishnum sarvalokamaheshvaram
Lokaadhyaksham stuvannityam sarvaduhkhaatigo bhavet

Verse 13

ब्रह्मण्यं सर्वधर्मज्ञं लोकानां कीर्तिवर्धनम् ।
लोकनाथं महद्भूतं सर्वभूतभवोद्भवम् ॥ १३॥

Brahmanyam sarvadharmajnam lokaanaam keertivardhanam
Lokanaatham mahadbhootam sarvabhootabhavodbhavam

Verse 14

एष मे सर्वधर्माणां धर्मोऽधिकतमो मतः ।
यद्भक्त्या पुण्डरीकाक्षं स्तवैरर्चेन्नरः सदा ॥ १४॥

Esha me sarvadharmaanaam dharmodhikatamo matah
Yadbhaktyaa pundareekaaksham stavairarchennarah sadaa

Verse 15

परमं यो महत्तेजः परमं यो महत्तपः ।
परमं यो महद्ब्रह्म परमं यः परायणम् ॥ १५॥

Paramam yo mahattejah paramam yo mahattapah
Paramam yo mahadbrahma paramam yah paraayanam

Verse 16

पवित्राणां पवित्रं यो मङ्गलानां च मङ्गलम् ।
दैवतं देवतानां च भूतानां योऽव्ययः पिता ॥ १६॥

Pavitraanaam pavitram yo mangalaanaam cha mangalam
Daivatam devataanaam cha bhootaanaam yovyayah pitaa

Verse 17

यतः सर्वाणि भूतानि भवन्त्यादियुगागमे ।
यस्मिंश्च प्रलयं यान्ति पुनरेव युगक्षये ॥ १७॥

Yatah sarvaani bhootaani bhavantyaadiyugaagame
Yasminshcha pralayam yaanti punareva yugakshaye

Verse 18

तस्य लोकप्रधानस्य जगन्नाथस्य भूपते ।
विष्णोर्नामसहस्रं मे शृणु पापभयापहम् ॥ १८॥

Tasya lokapradhaanasya jagannaathasya bhoopate
Vishnornaamasahasram me shrinu paapabhayaapaham

Verse 19

यानि नामानि गौणानि विख्यातानि महात्मनः ।
ऋषिभिः परिगीतानि तानि वक्ष्यामि भूतये ॥ १९॥

Yaani naamaani gaunaani vikhyaataani mahaatmanah
Rishibhih parigeetaani taani vakshyaami bhootaye

Verse 20

ऋषिर्नाम्नां सहस्रस्य वेदव्यासो महामुनिः ।
छन्दोऽनुष्टुप् तथा देवो भगवान् देवकीसुतः ॥ २०॥

Rishirnaamnaam sahasrasya vedavyaaso mahaamunih
Chhandonushtup tathaa devo bhagavaan devakeesutah

Verse 21

अमृतांशूद्भवो बीजं शक्तिर्देवकीनन्दनः ।
त्रिसामा हृदयं तस्य शान्त्यर्थे विनियुज्यते ॥ २१॥

Amritaanshoodbhavo beejam shaktirdevakeenandanah
Trisaamaa hridayam tasya shaantyarthe viniyujyate

Verse 22

विष्णुं जिष्णुं महाविष्णुं प्रभविष्णुं महेश्वरम् ।
अनेकरूपदैत्यान्तं नमामि पुरुषोत्तमम् ॥ २२॥

Vishnum jishnum mahaavishnum prabhavishnum maheshvaram
Anekaroopadaityaantam namaami purushottamam

Dhyana 1

क्षीरोदन्वत्प्रदेशे शुचिमणिविलसत्सैकते मौक्तिकानां
मालाकॢप्तासनस्थः स्फटिकमणिनिभैर्मौक्तिकैर्मण्डिताङ्गः ।
शुभ्रैरभ्रैरदभ्रैरुपरिविरचितैर्मुक्तपीयूषवर्षै-
रानन्दी नः पुनीयादरिनलिनगदाशङ्खपाणिर्मुकुन्दः ॥ १॥

Ksheerodanvatpradeshe shuchimanivilasatsaikate mauktikaanaam
Maalaaklriptaasanasthah sphatikamaninibhairmauktikairmanditaangah
Shubhrairabhrairadabhrairuparivirachitairmuktapeeyooshavarshai
Raanandee nah puneeyaadarinalinagadaashankhapaanirmukundah

Dhyana 2

भूः पादौ यस्य नाभिर्वियदसुरनिलश्चन्द्रसूर्यौ च नेत्रे
कर्णावाशाः शिरो द्यौर्मुखमपि दहनो यस्य वास्तेयमब्धिः ।
अन्तःस्थं यस्य विश्वं सुरनरखगगोभोगिगन्धर्वदैत्यैः
चित्रं रंरम्यते तं त्रिभुवनवपुषं विष्णुमीशं नमामि ॥ २॥

Bhooh paadau yasya naabhirviyadasuranilashchandrasooryau cha netre
Karnaavaashaah shiro dyaurmukhamapi dahano yasya vaasteyamabdhih
Antahstham yasya vishvam suranarakhagagobhogigandharvadaityaih
Chitram ranramyate tam tribhuvanavapusham vishnumeesham namaami

Dhyana 3

ॐ नमो भगवते वासुदेवाय ॥
ॐ शान्ताकारं भुजगशयनं पद्मनाभं सुरेशं
विश्वाधारं गगनसदृशं मेघवर्णं शुभाङ्गम् ।
लक्ष्मीकान्तं कमलनयनं योगिभिर्ध्यानगम्यं
वन्दे विष्णुं भवभयहरं सर्वलोकैकनाथम् ॥ ३॥

Om namo bhagavate vaasudevaaya
Om shaantaakaaram bhujagashayanam padmanaabham suresham
Vishvaadhaaram gaganasadrisham meghavarnam shubhaangam
Lakshmeekaantam kamalanayanam yogibhirdhyaanagamyam
Vande vishnum bhavabhayaharam sarvalokaikanaatham

Dhyana 4

मेघश्यामं पीतकौशेयवासं
श्रीवत्साङ्कं कौस्तुभोद्भासिताङ्गम् ।
पुण्योपेतं पुण्डरीकायताक्षं
विष्णुं वन्दे सर्वलोकैकनाथम् ॥ ४॥

Meghashyaamam peetakausheyavaasam
Shreevatsaankam kaustubhodbhaasitaangam
Punyopetam pundareekaayataaksham
Vishnum vande sarvalokaikanaatham

Dhyana 5

नमः समस्तभूतानामादिभूताय भूभृते ।
अनेकरूपरूपाय विष्णवे प्रभविष्णवे ॥ ५॥

Namah samastabhootaanaamaadibhootaaya bhoobhrite
Anekarooparoopaaya vishnave prabhavishnave

Dhyana 6

सशङ्खचक्रं सकिरीटकुण्डलं
सपीतवस्त्रं सरसीरुहेक्षणम् ।
सहारवक्षःस्थलकौस्तुभश्रियं
नमामि विष्णुं शिरसा चतुर्भुजम् ॥ ६॥

Sashankhachakram sakireetakundalam
Sapeetavastram saraseeruhekshanam
Sahaaravakshahsthalakaustubhashriyam
Namaami vishnum shirasaa chaturbhujam

Dhyana 7

छायायां पारिजातस्य हेमसिंहासनोपरि
आसीनमम्बुदश्याममायताक्षमलंकृतम् ।
चन्द्राननं चतुर्बाहुं श्रीवत्साङ्कितवक्षसं
रुक्मिणीसत्यभामाभ्यां सहितं कृष्णमाश्रये ॥ ७॥

Chhaayaayaam paarijaatasya hemasinhaasanopari
Aaseenamambudashyaamamaayataakshamalankritam
Chandraananam chaturbaahum shreevatsaankitavakshasam
Rukmineesatyabhaamaabhyaam sahitam krishnamaashraye

Verse 1

ॐ विश्वं विष्णुर्वषट्कारो भूतभव्यभवत्प्रभुः ।
भूतकृद्भूतभृद्भावो भूतात्मा भूतभावनः ॥ १॥

Om vishvam vishnurvashatkaaro bhootabhavyabhavatprabhuh
Bhootakridbhootabhridbhaavo bhootaatmaa bhootabhaavanah

Verse 2

पूतात्मा परमात्मा च मुक्तानां परमा गतिः ।
अव्ययः पुरुषः साक्षी क्षेत्रज्ञोऽक्षर एव च ॥ २॥

Pootaatmaa paramaatmaa cha muktaanaam paramaa gatih
Avyayah purushah saakshee kshetrajnokshara eva cha

Verse 3

योगो योगविदां नेता प्रधानपुरुषेश्वरः ।
नारसिंहवपुः श्रीमान् केशवः पुरुषोत्तमः ॥ ३॥

Yogo yogavidaam netaa pradhaanapurusheshvarah
Naarasinhavapuh shreemaan keshavah purushottamah

Verse 4

सर्वः शर्वः शिवः स्थाणुर्भूतादिर्निधिरव्ययः ।
सम्भवो भावनो भर्ता प्रभवः प्रभुरीश्वरः ॥ ४॥

Sarvah sharvah shivah sthaanurbhootaadirnidhiravyayah
Sambhavo bhaavano bhartaa prabhavah prabhureeshvarah

Verse 5

स्वयम्भूः शम्भुरादित्यः पुष्कराक्षो महास्वनः ।
अनादिनिधनो धाता विधाता धातुरुत्तमः ॥ ५॥

Svayambhooh shambhuraadityah pushkaraaksho mahaasvanah
Anaadinidhano dhaataa vidhaataa dhaaturuttamah

Verse 6

अप्रमेयो हृषीकेशः पद्मनाभोऽमरप्रभुः ।
विश्वकर्मा मनुस्त्वष्टा स्थविष्ठः स्थविरो ध्रुवः ॥ ६॥

Aprameyo hrisheekeshah padmanaabhomaraprabhuh
Vishvakarmaa manustvashtaa sthavishthah sthaviro dhruvah

Verse 7

अग्राह्यः शाश्वतः कृष्णो लोहिताक्षः प्रतर्दनः ।
प्रभूतस्त्रिककुब्धाम पवित्रं मङ्गलं परम् ॥ ७॥

Agraahyah shaashvatah krishno lohitaakshah pratardanah
Prabhootastrikakubdhaama pavitram mangalam param

Verse 8

ईशानः प्राणदः प्राणो ज्येष्ठः श्रेष्ठः प्रजापतिः ।
हिरण्यगर्भो भूगर्भो माधवो मधुसूदनः ॥ ८॥

Eeshaanah praanadah praano jyeshthah shreshthah prajaapatih
Hiranyagarbho bhoogarbho maadhavo madhusoodanah

Verse 9

ईश्वरो विक्रमी धन्वी मेधावी विक्रमः क्रमः ।
अनुत्तमो दुराधर्षः कृतज्ञः कृतिरात्मवान् ॥ ९॥

Eeshvaro vikramee dhanvee medhaavee vikramah kramah
Anuttamo duraadharshah kritajnah kritiraatmavaan

Verse 10

सुरेशः शरणं शर्म विश्वरेताः प्रजाभवः ।
अहः संवत्सरो व्यालः प्रत्ययः सर्वदर्शनः ॥ १०॥

Sureshah sharanam sharma vishvaretaah prajaabhavah
Ahah sanvatsaro vyaalah pratyayah sarvadarshanah

Verse 11

अजः सर्वेश्वरः सिद्धः सिद्धिः सर्वादिरच्युतः ।
वृषाकपिरमेयात्मा सर्वयोगविनिःसृतः ॥ ११॥

Ajah sarveshvarah siddhah siddhih sarvaadirachyutah
Vrishaakapirameyaatmaa sarvayogavinihsritah

Verse 12

वसुर्वसुमनाः सत्यः समात्माऽसम्मितः समः ।
अमोघः पुण्डरीकाक्षो वृषकर्मा वृषाकृतिः ॥ १२॥

Vasurvasumanaah satyah samaatmaasammitah samah
Amoghah pundareekaaksho vrishakarmaa vrishaakritih

Verse 13

रुद्रो बहुशिरा बभ्रुर्विश्वयोनिः शुचिश्रवाः ।
अमृतः शाश्वतस्थाणुर्वरारोहो महातपाः ॥ १३॥

Rudro bahushiraa babhrurvishvayonih shuchishravaah
Amritah shaashvatasthaanurvaraaroho mahaatapaah

Verse 14

सर्वगः सर्वविद्भानुर्विष्वक्सेनो जनार्दनः ।
वेदो वेदविदव्यङ्गो वेदाङ्गो वेदवित् कविः ॥ १४॥

Sarvagah sarvavidbhaanurvishvakseno janaardanah
Vedo vedavidavyango vedaango vedavit kavih

Verse 15

लोकाध्यक्षः सुराध्यक्षो धर्माध्यक्षः कृताकृतः ।
चतुरात्मा चतुर्व्यूहश्चतुर्दंष्ट्रश्चतुर्भुजः ॥ १५॥

Lokaadhyakshah suraadhyaksho dharmaadhyakshah kritaakritah
Chaturaatmaa chaturvyoohashchaturdanshtrashchaturbhujah

Verse 16

भ्राजिष्णुर्भोजनं भोक्ता सहिष्णुर्जगदादिजः ।
अनघो विजयो जेता विश्वयोनिः पुनर्वसुः ॥ १६॥

Bhraajishnurbhojanam bhoktaa sahishnurjagadaadijah
Anagho vijayo jetaa vishvayonih punarvasuh

Verse 17

उपेन्द्रो वामनः प्रांशुरमोघः शुचिरूर्जितः ।
अतीन्द्रः सङ्ग्रहः सर्गो धृतात्मा नियमो यमः ॥ १७॥

Upendro vaamanah praanshuramoghah shuchiroorjitah
Ateendrah sangrahah sargo dhritaatmaa niyamo yamah

Verse 18

वेद्यो वैद्यः सदायोगी वीरहा माधवो मधुः ।
अतीन्द्रियो महामायो महोत्साहो महाबलः ॥ १८॥

Vedyo vaidyah sadaayogee veerahaa maadhavo madhuh
Ateendriyo mahaamaayo mahotsaaho mahaabalah

Verse 19

महाबुद्धिर्महावीर्यो महाशक्तिर्महाद्युतिः ।
अनिर्देश्यवपुः श्रीमानमेयात्मा महाद्रिधृक् ॥ १९॥

Mahaabuddhirmahaaveeryo mahaashaktirmahaadyutih
Anirdeshyavapuh shreemaanameyaatmaa mahaadridhrik

Verse 20

महेष्वासो महीभर्ता श्रीनिवासः सतां गतिः ।
अनिरुद्धः सुरानन्दो गोविन्दो गोविदां पतिः ॥ २०॥

Maheshvaaso maheebhartaa shreenivaasah sataam gatih
Aniruddhah suraanando govindo govidaam patih

Verse 21

मरीचिर्दमनो हंसः सुपर्णो भुजगोत्तमः ।
हिरण्यनाभः सुतपाः पद्मनाभः प्रजापतिः ॥ २१॥

Mareechirdamano hansah suparno bhujagottamah
Hiranyanaabhah sutapaah padmanaabhah prajaapatih

Verse 22

अमृत्युः सर्वदृक् सिंहः सन्धाता सन्धिमान् स्थिरः ।
अजो दुर्मर्षणः शास्ता विश्रुतात्मा सुरारिहा ॥ २२॥

Amrityuh sarvadrik sinhah sandhaataa sandhimaan sthirah
Ajo durmarshanah shaastaa vishrutaatmaa suraarihaa

Verse 23

गुरुर्गुरुतमो धाम सत्यः सत्यपराक्रमः ।
निमिषोऽनिमिषः स्रग्वी वाचस्पतिरुदारधीः ॥ २३॥

Gururgurutamo dhaama satyah satyaparaakramah
Nimishonimishah sragvee vaachaspatirudaaradheeh

Verse 24

अग्रणीर्ग्रामणीः श्रीमान् न्यायो नेता समीरणः ।
सहस्रमूर्धा विश्वात्मा सहस्राक्षः सहस्रपात् ॥ २४॥

Agraneergraamaneeh shreemaan nyaayo netaa sameeranah
Sahasramoordhaa vishvaatmaa sahasraakshah sahasrapaat

Verse 25

आवर्तनो निवृत्तात्मा संवृतः सम्प्रमर्दनः ।
अहः संवर्तको वह्निरनिलो धरणीधरः ॥ २५॥

Aavartano nivrittaatmaa sanvritah sampramardanah
Ahah sanvartako vahniranilo dharaneedharah

Verse 26

सुप्रसादः प्रसन्नात्मा विश्वधृग्विश्वभुग्विभुः ।
सत्कर्ता सत्कृतः साधुर्जह्नुर्नारायणो नरः ॥ २६॥

Suprasaadah prasannaatmaa vishvadhrigvishvabhugvibhuh
Satkartaa satkritah saadhurjahnurnaaraayano narah

Verse 27

असङ्ख्येयोऽप्रमेयात्मा विशिष्टः शिष्टकृच्छुचिः ।
सिद्धार्थः सिद्धसङ्कल्पः सिद्धिदः सिद्धिसाधनः ॥ २७॥

Asankhyeyoprameyaatmaa vishishtah shishtakrichchhuchih
Siddhaarthah siddhasankalpah siddhidah siddhisaadhanah

Verse 28

वृषाही वृषभो विष्णुर्वृषपर्वा वृषोदरः ।
वर्धनो वर्धमानश्च विविक्तः श्रुतिसागरः ॥ २८॥

Vrishaahee vrishabho vishnurvrishaparvaa vrishodarah
Vardhano vardhamaanashcha viviktah shrutisaagarah

Verse 29

सुभुजो दुर्धरो वाग्मी महेन्द्रो वसुदो वसुः ।
नैकरूपो बृहद्रूपः शिपिविष्टः प्रकाशनः ॥ २९॥

Subhujo durdharo vaagmee mahendro vasudo vasuh
Naikaroopo brihadroopah shipivishtah prakaashanah

Verse 30

ओजस्तेजोद्युतिधरः प्रकाशात्मा प्रतापनः ।
ऋद्धः स्पष्टाक्षरो मन्त्रश्चन्द्रांशुर्भास्करद्युतिः ॥ ३०॥

Ojastejodyutidharah prakaashaatmaa prataapanah
Riddhah spashtaaksharo mantrashchandraanshurbhaaskaradyutih

Verse 31

अमृतांशूद्भवो भानुः शशबिन्दुः सुरेश्वरः ।
औषधं जगतः सेतुः सत्यधर्मपराक्रमः ॥ ३१॥

Amritaanshoodbhavo bhaanuh shashabinduh sureshvarah
Aushadham jagatah setuh satyadharmaparaakramah

Verse 32

भूतभव्यभवन्नाथः पवनः पावनोऽनलः ।
कामहा कामकृत्कान्तः कामः कामप्रदः प्रभुः ॥ ३२॥

Bhootabhavyabhavannaathah pavanah paavanonalah
Kaamahaa kaamakritkaantah kaamah kaamapradah prabhuh

Verse 33

युगादिकृद्युगावर्तो नैकमायो महाशनः ।
अदृश्यो व्यक्तरूपश्च सहस्रजिदनन्तजित् ॥ ३३॥

Yugaadikridyugaavarto naikamaayo mahaashanah
Adrishyo vyaktaroopashcha sahasrajidanantajit

Verse 34

इष्टोऽविशिष्टः शिष्टेष्टः शिखण्डी नहुषो वृषः ।
क्रोधहा क्रोधकृत्कर्ता विश्वबाहुर्महीधरः ॥ ३४॥

Ishtovishishtah shishteshtah shikhandee nahusho vrishah
Krodhahaa krodhakritkartaa vishvabaahurmaheedharah

Verse 35

अच्युतः प्रथितः प्राणः प्राणदो वासवानुजः ।
अपांनिधिरधिष्ठानमप्रमत्तः प्रतिष्ठितः ॥ ३५॥

Achyutah prathitah praanah praanado vaasavaanujah
Apaannidhiradhishthaanamapramattah pratishthitah

Verse 36

स्कन्दः स्कन्दधरो धुर्यो वरदो वायुवाहनः ।
वासुदेवो बृहद्भानुरादिदेवः पुरन्दरः ॥ ३६॥

Skandah skandadharo dhuryo varado vaayuvaahanah
Vaasudevo brihadbhaanuraadidevah purandarah

Verse 37

अशोकस्तारणस्तारः शूरः शौरिर्जनेश्वरः ।
अनुकूलः शतावर्तः पद्मी पद्मनिभेक्षणः ॥ ३७॥

Ashokastaaranastaarah shoorah shaurirjaneshvarah
Anukoolah shataavartah padmee padmanibhekshanah

Verse 38

पद्मनाभोऽरविन्दाक्षः पद्मगर्भः शरीरभृत् ।
महर्द्धिरृद्धो वृद्धात्मा महाक्षो गरुडध्वजः ॥ ३८॥

Padmanaabhoravindaakshah padmagarbhah shareerabhrit
Maharddhirriddho vriddhaatmaa mahaaksho garudadhvajah

Verse 39

अतुलः शरभो भीमः समयज्ञो हविर्हरिः ।
सर्वलक्षणलक्षण्यो लक्ष्मीवान् समितिञ्जयः ॥ ३९॥

Atulah sharabho bheemah samayajno havirharih
Sarvalakshanalakshanyo lakshmeevaan samitinjayah

Verse 40

विक्षरो रोहितो मार्गो हेतुर्दामोदरः सहः ।
महीधरो महाभागो वेगवानमिताशनः ॥ ४०॥

Viksharo rohito maargo heturdaamodarah sahah
Maheedharo mahaabhaago vegavaanamitaashanah

Verse 41

उद्भवः क्षोभणो देवः श्रीगर्भः परमेश्वरः ।
करणं कारणं कर्ता विकर्ता गहनो गुहः ॥ ४१॥

Udbhavah kshobhano devah shreegarbhah parameshvarah
Karanam kaaranam kartaa vikartaa gahano guhah

Verse 42

व्यवसायो व्यवस्थानः संस्थानः स्थानदो ध्रुवः ।
परर्द्धिः परमस्पष्टस्तुष्टः पुष्टः शुभेक्षणः ॥ ४२॥

Vyavasaayo vyavasthaanah sansthaanah sthaanado dhruvah
Pararddhih paramaspashtastushtah pushtah shubhekshanah

Verse 43

रामो विरामो विरजो मार्गो नेयो नयोऽनयः ।
वीरः शक्तिमतां श्रेष्ठो धर्मो धर्मविदुत्तमः ॥ ४३॥

Raamo viraamo virajo maargo neyo nayonayah
Veerah shaktimataam shreshtho dharmo dharmaviduttamah

Verse 44

वैकुण्ठः पुरुषः प्राणः प्राणदः प्रणवः पृथुः ।
हिरण्यगर्भः शत्रुघ्नो व्याप्तो वायुरधोक्षजः ॥ ४४॥

Vaikunthah purushah praanah praanadah pranavah prithuh
Hiranyagarbhah shatrughno vyaapto vaayuradhokshajah

Verse 45

ऋतुः सुदर्शनः कालः परमेष्ठी परिग्रहः ।
उग्रः संवत्सरो दक्षो विश्रामो विश्वदक्षिणः ॥ ४५॥

Rituh sudarshanah kaalah parameshthee parigrahah
Ugrah sanvatsaro daksho vishraamo vishvadakshinah

Verse 46

विस्तारः स्थावरस्थाणुः प्रमाणं बीजमव्ययम् ।
अर्थोऽनर्थो महाकोशो महाभोगो महाधनः ॥ ४६॥

Vistaarah sthaavarasthaanuh pramaanam beejamavyayam
Arthonartho mahaakosho mahaabhogo mahaadhanah

Verse 47

अनिर्विण्णः स्थविष्ठोऽभूर्धर्मयूपो महामखः ।
नक्षत्रनेमिर्नक्षत्री क्षमः क्षामः समीहनः ॥ ४७॥

Anirvinnah sthavishthobhoordharmayoopo mahaamakhah
Nakshatranemirnakshatree kshamah kshaamah sameehanah

Verse 48

यज्ञ इज्यो महेज्यश्च क्रतुः सत्रं सतां गतिः ।
सर्वदर्शी विमुक्तात्मा सर्वज्ञो ज्ञानमुत्तमम् ॥ ४८॥

Yajna ijyo mahejyashcha kratuh satram sataam gatih
Sarvadarshee vimuktaatmaa sarvajno jnaanamuttamam

Verse 49

सुव्रतः सुमुखः सूक्ष्मः सुघोषः सुखदः सुहृत् ।
मनोहरो जितक्रोधो वीरबाहुर्विदारणः ॥ ४९॥

Suvratah sumukhah sookshmah sughoshah sukhadah suhrit
Manoharo jitakrodho veerabaahurvidaaranah

Verse 50

स्वापनः स्ववशो व्यापी नैकात्मा नैककर्मकृत् ।
वत्सरो वत्सलो वत्सी रत्नगर्भो धनेश्वरः ॥ ५०॥

Svaapanah svavasho vyaapee naikaatmaa naikakarmakrit
Vatsaro vatsalo vatsee ratnagarbho dhaneshvarah

Verse 51

धर्मगुब्धर्मकृद्धर्मी सदसत्क्षरमक्षरम् ।
अविज्ञाता सहस्रांशुर्विधाता कृतलक्षणः ॥ ५१॥

Dharmagubdharmakriddharmee sadasatksharamaksharam
Avijnaataa sahasraanshurvidhaataa kritalakshanah

Verse 52

गभस्तिनेमिः सत्त्वस्थः सिंहो भूतमहेश्वरः ।
आदिदेवो महादेवो देवेशो देवभृद्गुरुः ॥ ५२॥

Gabhastinemih sattvasthah sinho bhootamaheshvarah
Aadidevo mahaadevo devesho devabhridguruh

Verse 53

उत्तरो गोपतिर्गोप्ता ज्ञानगम्यः पुरातनः ।
शरीरभूतभृद्भोक्ता कपीन्द्रो भूरिदक्षिणः ॥ ५३॥

Uttaro gopatirgoptaa jnaanagamyah puraatanah
Shareerabhootabhridbhoktaa kapeendro bhooridakshinah

Verse 54

सोमपोऽमृतपः सोमः पुरुजित्पुरुसत्तमः ।
विनयो जयः सत्यसन्धो दाशार्हः सात्वताम्पतिः ॥ ५४॥

Somapomritapah somah purujitpurusattamah
Vinayo jayah satyasandho daashaarhah saatvataampatih

Verse 55

जीवो विनयिता साक्षी मुकुन्दोऽमितविक्रमः ।
अम्भोनिधिरनन्तात्मा महोदधिशयोऽन्तकः ॥ ५५॥

Jeevo vinayitaa saakshee mukundomitavikramah
Ambhonidhiranantaatmaa mahodadhishayontakah

Verse 56

अजो महार्हः स्वाभाव्यो जितामित्रः प्रमोदनः ।
आनन्दो नन्दनो नन्दः सत्यधर्मा त्रिविक्रमः ॥ ५६॥

Ajo mahaarhah svaabhaavyo jitaamitrah pramodanah
Aanando nandano nandah satyadharmaa trivikramah

Verse 57

महर्षिः कपिलाचार्यः कृतज्ञो मेदिनीपतिः ।
त्रिपदस्त्रिदशाध्यक्षो महाशृङ्गः कृतान्तकृत् ॥ ५७॥

Maharshih kapilaachaaryah kritajno medineepatih
Tripadastridashaadhyaksho mahaashringah kritaantakrit

Verse 58

महावराहो गोविन्दः सुषेणः कनकाङ्गदी ।
गुह्यो गभीरो गहनो गुप्तश्चक्रगदाधरः ॥ ५८॥

Mahaavaraaho govindah sushenah kanakaangadee
Guhyo gabheero gahano guptashchakragadaadharah

Verse 59

वेधाः स्वाङ्गोऽजितः कृष्णो दृढः सङ्कर्षणोऽच्युतः ।
वरुणो वारुणो वृक्षः पुष्कराक्षो महामनाः ॥ ५९॥

Vedhaah svaangojitah krishno dridhah sankarshanochyutah
Varuno vaaruno vrikshah pushkaraaksho mahaamanaah

Verse 60

भगवान् भगहाऽऽनन्दी वनमाली हलायुधः ।
आदित्यो ज्योतिरादित्यः सहिष्णुर्गतिसत्तमः ॥ ६०॥

Bhagavaan bhagahaanandee vanamaalee halaayudhah
Aadityo jyotiraadityah sahishnurgatisattamah

Verse 61

सुधन्वा खण्डपरशुर्दारुणो द्रविणप्रदः ।
दिवस्पृक् सर्वदृग्व्यासो वाचस्पतिरयोनिजः ॥ ६१॥

Sudhanvaa khandaparashurdaaruno dravinapradah
Divasprik sarvadrigvyaaso vaachaspatirayonijah

Verse 62

त्रिसामा सामगः साम निर्वाणं भेषजं भिषक् ।
संन्यासकृच्छमः शान्तो निष्ठा शान्तिः परायणम् ॥ ६२॥

Trisaamaa saamagah saama nirvaanam bheshajam bhishak
Sannyaasakrichchhamah shaanto nishthaa shaantih paraayanam

Verse 63

शुभाङ्गः शान्तिदः स्रष्टा कुमुदः कुवलेशयः ।
गोहितो गोपतिर्गोप्ता वृषभाक्षो वृषप्रियः ॥ ६३॥

Shubhaangah shaantidah srashtaa kumudah kuvaleshayah
Gohito gopatirgoptaa vrishabhaaksho vrishapriyah

Verse 64

अनिवर्ती निवृत्तात्मा सङ्क्षेप्ता क्षेमकृच्छिवः ।
श्रीवत्सवक्षाः श्रीवासः श्रीपतिः श्रीमतांवरः ॥ ६४॥

Anivartee nivrittaatmaa sanksheptaa kshemakrichchhivah
Shreevatsavakshaah shreevaasah shreepatih shreemataanvarah

Verse 65

श्रीदः श्रीशः श्रीनिवासः श्रीनिधिः श्रीविभावनः ।
श्रीधरः श्रीकरः श्रेयः श्रीमाँल्लोकत्रयाश्रयः ॥ ६५॥

Shreedah shreeshah shreenivaasah shreenidhih shreevibhaavanah
Shreedharah shreekarah shreyah shreemaanllokatrayaashrayah

Verse 66

स्वक्षः स्वङ्गः शतानन्दो नन्दिर्ज्योतिर्गणेश्वरः ।
विजितात्माऽविधेयात्मा सत्कीर्तिश्छिन्नसंशयः ॥ ६६॥

Svakshah svangah shataanando nandirjyotirganeshvarah
Vijitaatmaavidheyaatmaa satkeertishchhinnasanshayah

Verse 67

उदीर्णः सर्वतश्चक्षुरनीशः शाश्वतस्थिरः ।
भूशयो भूषणो भूतिर्विशोकः शोकनाशनः ॥ ६७॥

Udeernah sarvatashchakshuraneeshah shaashvatasthirah
Bhooshayo bhooshano bhootirvishokah shokanaashanah

Verse 68

अर्चिष्मानर्चितः कुम्भो विशुद्धात्मा विशोधनः ।
अनिरुद्धोऽप्रतिरथः प्रद्युम्नोऽमितविक्रमः ॥ ६८॥

Archishmaanarchitah kumbho vishuddhaatmaa vishodhanah
Aniruddhopratirathah pradyumnomitavikramah

Verse 69

कालनेमिनिहा वीरः शौरिः शूरजनेश्वरः ।
त्रिलोकात्मा त्रिलोकेशः केशवः केशिहा हरिः ॥ ६९॥

Kaalaneminihaa veerah shaurih shoorajaneshvarah
Trilokaatmaa trilokeshah keshavah keshihaa harih

Verse 70

कामदेवः कामपालः कामी कान्तः कृतागमः ।
अनिर्देश्यवपुर्विष्णुर्वीरोऽनन्तो धनञ्जयः ॥ ७०॥

Kaamadevah kaamapaalah kaamee kaantah kritaagamah
Anirdeshyavapurvishnurveeronanto dhananjayah

Verse 71

ब्रह्मण्यो ब्रह्मकृद् ब्रह्मा ब्रह्म ब्रह्मविवर्धनः ।
ब्रह्मविद् ब्राह्मणो ब्रह्मी ब्रह्मज्ञो ब्राह्मणप्रियः ॥ ७१॥

Brahmanyo brahmakrid Brahmaa brahma brahmavivardhanah
Brahmavid braahmano brahmee brahmajno braahmanapriyah

Verse 72

महाक्रमो महाकर्मा महातेजा महोरगः ।
महाक्रतुर्महायज्वा महायज्ञो महाहविः ॥ ७२॥

Mahaakramo mahaakarmaa mahaatejaa mahoragah
Mahaakraturmahaayajvaa mahaayajno mahaahavih

Verse 73

स्तव्यः स्तवप्रियः स्तोत्रं स्तुतिः स्तोता रणप्रियः ।
पूर्णः पूरयिता पुण्यः पुण्यकीर्तिरनामयः ॥ ७३॥

Stavyah stavapriyah stotram stutih stotaa ranapriyah
Poornah poorayitaa punyah punyakeertiranaamayah

Verse 74

मनोजवस्तीर्थकरो वसुरेता वसुप्रदः ।
वसुप्रदो वासुदेवो वसुर्वसुमना हविः ॥ ७४॥

Manojavasteerthakaro vasuretaa vasupradah
Vasuprado vaasudevo vasurvasumanaa havih

Verse 75

सद्गतिः सत्कृतिः सत्ता सद्भूतिः सत्परायणः ।
शूरसेनो यदुश्रेष्ठः सन्निवासः सुयामुनः ॥ ७५॥

Sadgatih satkritih sattaa sadbhootih satparaayanah
Shooraseno yadushreshthah sannivaasah suyaamunah

Verse 76

भूतावासो वासुदेवः सर्वासुनिलयोऽनलः ।
दर्पहा दर्पदो दृप्तो दुर्धरोऽथापराजितः ॥ ७६॥

Bhootaavaaso vaasudevah sarvaasunilayonalah
Darpahaa darpado dripto durdharothaaparaajitah

Verse 77

विश्वमूर्तिर्महामूर्तिर्दीप्तमूर्तिरमूर्तिमान् ।
अनेकमूर्तिरव्यक्तः शतमूर्तिः शताननः ॥ ७७॥

Vishvamoortirmahaamoortirdeeptamoortiramoortimaan
Anekamoortiravyaktah shatamoortih shataananah

Verse 78

एको नैकः सवः कः किं यत् तत्पदमनुत्तमम् ।
लोकबन्धुर्लोकनाथो माधवो भक्तवत्सलः ॥ ७८॥

Eko naikah savah kah kim yat tatpadamanuttamam
Lokabandhurlokanaatho maadhavo bhaktavatsalah

Verse 79

सुवर्णवर्णो हेमाङ्गो वराङ्गश्चन्दनाङ्गदी ।
वीरहा विषमः शून्यो घृताशीरचलश्चलः ॥ ७९॥

Suvarnavarno hemaango varaangashchandanaangadee
Veerahaa vishamah shoonyo ghritaasheerachalashchalah

Verse 80

अमानी मानदो मान्यो लोकस्वामी त्रिलोकधृक् ।
सुमेधा मेधजो धन्यः सत्यमेधा धराधरः ॥ ८०॥

Amaanee maanado maanyo lokasvaamee trilokadhrik
Sumedhaa medhajo dhanyah satyamedhaa dharaadharah

Verse 81

तेजोवृषो द्युतिधरः सर्वशस्त्रभृतां वरः ।
प्रग्रहो निग्रहो व्यग्रो नैकशृङ्गो गदाग्रजः ॥ ८१॥

Tejovrisho dyutidharah sarvashastrabhritaam varah
Pragraho nigraho vyagro naikashringo gadaagrajah

Verse 82

चतुर्मूर्तिश्चतुर्बाहुश्चतुर्व्यूहश्चतुर्गतिः ।
चतुरात्मा चतुर्भावश्चतुर्वेदविदेकपात् ॥ ८२॥

Chaturmoortishchaturbaahushchaturvyoohashchaturgatih
Chaturaatmaa chaturbhaavashchaturvedavidekapaat

Verse 83

समावर्तोऽनिवृत्तात्मा दुर्जयो दुरतिक्रमः ।
दुर्लभो दुर्गमो दुर्गो दुरावासो दुरारिहा ॥ ८३॥

Samaavartonivrittaatmaa durjayo duratikramah
Durlabho durgamo durgo duraavaaso duraarihaa

Verse 84

शुभाङ्गो लोकसारङ्गः सुतन्तुस्तन्तुवर्धनः ।
इन्द्रकर्मा महाकर्मा कृतकर्मा कृतागमः ॥ ८४॥

Shubhaango lokasaarangah sutantustantuvardhanah
Indrakarmaa mahaakarmaa kritakarmaa kritaagamah

Verse 85

उद्भवः सुन्दरः सुन्दो रत्ननाभः सुलोचनः ।
अर्को वाजसनः शृङ्गी जयन्तः सर्वविज्जयी ॥ ८५॥

Udbhavah sundarah sundo ratnanaabhah sulochanah
Arko vaajasanah shringee jayantah sarvavijjayee

Verse 86

सुवर्णबिन्दुरक्षोभ्यः सर्ववागीश्वरेश्वरः ।
महाह्रदो महागर्तो महाभूतो महानिधिः ॥ ८६॥

Suvarnabindurakshobhyah sarvavaageeshvareshvarah
Mahaahrado mahaagarto mahaabhooto mahaanidhih

Verse 87

कुमुदः कुन्दरः कुन्दः पर्जन्यः पावनोऽनिलः ।
अमृताशोऽमृतवपुः सर्वज्ञः सर्वतोमुखः ॥ ८७॥

Kumudah kundarah kundah parjanyah paavanonilah
Amritaashomritavapuh sarvajnah sarvatomukhah

Verse 88

सुलभः सुव्रतः सिद्धः शत्रुजिच्छत्रुतापनः ।
न्यग्रोधोऽदुम्बरोऽश्वत्थश्चाणूरान्ध्रनिषूदनः ॥ ८८॥

Sulabhah suvratah siddhah shatrujichchhatrutaapanah
Nyagrodhodumbaroshvatthashchaanooraandhranishoodanah

Verse 89

सहस्रार्चिः सप्तजिह्वः सप्तैधाः सप्तवाहनः ।
अमूर्तिरनघोऽचिन्त्यो भयकृद्भयनाशनः ॥ ८९॥

Sahasraarchih saptajihvah saptaidhaah saptavaahanah
Amoortiranaghochintyo bhayakridbhayanaashanah

Verse 90

अणुर्बृहत्कृशः स्थूलो गुणभृन्निर्गुणो महान् ।
अधृतः स्वधृतः स्वास्यः प्राग्वंशो वंशवर्धनः ॥ ९०॥

Anurbrihatkrishah sthoolo gunabhrinnirguno mahaan
Adhritah svadhritah svaasyah praagvansho vanshavardhanah

Verse 91

भारभृत् कथितो योगी योगीशः सर्वकामदः ।
आश्रमः श्रमणः क्षामः सुपर्णो वायुवाहनः ॥ ९१॥

Bhaarabhrit kathito yogee yogeeshah sarvakaamadah
Aashramah shramanah kshaamah suparno vaayuvaahanah

Verse 92

धनुर्धरो धनुर्वेदो दण्डो दमयिता दमः ।
अपराजितः सर्वसहो नियन्ताऽनियमोऽयमः ॥ ९२॥

Dhanurdharo dhanurvedo dando damayitaa damah
Aparaajitah sarvasaho niyantaaniyamoyamah

Verse 93

सत्त्ववान् सात्त्विकः सत्यः सत्यधर्मपरायणः ।
अभिप्रायः प्रियार्होऽर्हः प्रियकृत् प्रीतिवर्धनः ॥ ९३॥

Sattvavaan saattvikah satyah satyadharmaparaayanah
Abhipraayah priyaarhorhah priyakrit preetivardhanah

Verse 94

विहायसगतिर्ज्योतिः सुरुचिर्हुतभुग्विभुः ।
रविर्विरोचनः सूर्यः सविता रविलोचनः ॥ ९४॥

Vihaayasagatirjyotih suruchirhutabhugvibhuh
Ravirvirochanah sooryah savitaa ravilochanah

Verse 95

अनन्तो हुतभुग्भोक्ता सुखदो नैकजोऽग्रजः ।
अनिर्विण्णः सदामर्षी लोकाधिष्ठानमद्भुतः ॥ ९५॥

Ananto hutabhugbhoktaa sukhado naikajograjah
Anirvinnah sadaamarshee lokaadhishthaanamadbhutah

Verse 96

सनात्सनातनतमः कपिलः कपिरव्ययः ।
स्वस्तिदः स्वस्तिकृत्स्वस्ति स्वस्तिभुक्स्वस्तिदक्षिणः ॥ ९६॥

Sanaatsanaatanatamah kapilah kapiravyayah
Svastidah svastikritsvasti svastibhuksvastidakshinah

Verse 97

अरौद्रः कुण्डली चक्री विक्रम्यूर्जितशासनः ।
शब्दातिगः शब्दसहः शिशिरः शर्वरीकरः ॥ ९७॥

Araudrah kundalee chakree vikramyoorjitashaasanah
Shabdaatigah shabdasahah shishirah sharvareekarah

Verse 98

अक्रूरः पेशलो दक्षो दक्षिणः क्षमिणांवरः ।
विद्वत्तमो वीतभयः पुण्यश्रवणकीर्तनः ॥ ९८॥

Akroorah peshalo daksho dakshinah kshaminaanvarah
Vidvattamo veetabhayah punyashravanakeertanah

Verse 99

उत्तारणो दुष्कृतिहा पुण्यो दुःस्वप्ननाशनः ।
वीरहा रक्षणः सन्तो जीवनः पर्यवस्थितः ॥ ९९॥

Uttaarano dushkritihaa punyo duhsvapnanaashanah
Veerahaa rakshanah santo jeevanah paryavasthitah

Verse 100

अनन्तरूपोऽनन्तश्रीर्जितमन्युर्भयापहः ।
चतुरश्रो गभीरात्मा विदिशो व्यादिशो दिशः ॥ १००॥

Anantarooponantashreerjitamanyurbhayaapahah
Chaturashro gabheeraatmaa vidisho vyaadisho dishah

Verse 101

अनादिर्भूर्भुवो लक्ष्मीः सुवीरो रुचिराङ्गदः ।
जननो जनजन्मादिर्भीमो भीमपराक्रमः ॥ १०१॥

Anaadirbhoorbhuvo lakshmeeh suveero ruchiraangadah
Janano janajanmaadirbheemo bheemaparaakramah

Verse 102

आधारनिलयोऽधाता पुष्पहासः प्रजागरः ।
ऊर्ध्वगः सत्पथाचारः प्राणदः प्रणवः पणः ॥ १०२॥

Aadhaaranilayodhaataa pushpahaasah prajaagarah
Oordhvagah satpathaachaarah praanadah pranavah panah

Verse 103

प्रमाणं प्राणनिलयः प्राणभृत्प्राणजीवनः ।
तत्त्वं तत्त्वविदेकात्मा जन्ममृत्युजरातिगः ॥ १०३॥

Pramaanam praananilayah praanabhritpraanajeevanah
Tattvam tattvavidekaatmaa janmamrityujaraatigah

Verse 104

भूर्भुवःस्वस्तरुस्तारः सविता प्रपितामहः ।
यज्ञो यज्ञपतिर्यज्वा यज्ञाङ्गो यज्ञवाहनः ॥ १०४॥

Bhoorbhuvahsvastarustaarah savitaa prapitaamahah
Yajno yajnapatiryajvaa yajnaango yajnavaahanah

Verse 105

यज्ञभृद् यज्ञकृद् यज्ञी यज्ञभुग् यज्ञसाधनः ।
यज्ञान्तकृद् यज्ञगुह्यमन्नमन्नाद एव च ॥ १०५॥

Yajnabhrid yajnakrid yajnee yajnabhug yajnasaadhanah
Yajnaantakrid yajnaguhyamannamannaada eva cha

Verse 106

आत्मयोनिः स्वयञ्जातो वैखानः सामगायनः ।
देवकीनन्दनः स्रष्टा क्षितीशः पापनाशनः ॥ १०६॥

Aatmayonih svayanjaato vaikhaanah saamagaayanah
Devakeenandanah srashtaa kshiteeshah paapanaashanah

Verse 107

शङ्खभृन्नन्दकी चक्री शार्ङ्गधन्वा गदाधरः ।
रथाङ्गपाणिरक्षोभ्यः सर्वप्रहरणायुधः ॥ १०७॥

Shankhabhrinnandakee chakree shaarngadhanvaa gadaadharah
Rathaangapaanirakshobhyah sarvapraharanaayudhah

Verse 108

वनमाली गदी शार्ङ्गी शङ्खी चक्री च नन्दकी ।
श्रीमान् नारायणो विष्णुर्वासुदेवोऽभिरक्षतु ॥ १०८॥

Vanamaalee gadee shaarngee shankhee chakree cha nandakee
Shreemaan naaraayano vishnurvaasudevobhirakshatu

Closing verse 1

भीष्म उवाच
इतीदं कीर्तनीयस्य केशवस्य महात्मनः ।
नाम्नां सहस्रं दिव्यानामशेषेण प्रकीर्तितम् ॥ १॥

Bheeshma uvaacha
Iteedam keertaneeyasya keshavasya mahaatmanah
Naamnaam sahasram divyaanaamasheshena prakeertitam

Closing verse 2

य इदं शृणुयान्नित्यं यश्चापि परिकीर्तयेत् ।
नाशुभं प्राप्नुयात्किञ्चित्सोऽमुत्रेह च मानवः ॥ २॥

Ya idam shrinuyaannityam yashchaapi parikeertayet
Naashubham praapnuyaatkinchitsomutreha cha maanavah

Closing verse 3

वेदान्तगो ब्राह्मणः स्यात्क्षत्रियो विजयी भवेत् ।
वैश्यो धनसमृद्धः स्याच्छूद्रः सुखमवाप्नुयात् ॥ ३॥

Vedaantago braahmanah syaatkshatriyo vijayee bhavet
Vaishyo dhanasamriddhah syaachchhoodrah sukhamavaapnuyaat

Closing verse 4

धर्मार्थी प्राप्नुयाद्धर्ममर्थार्थी चार्थमाप्नुयात् ।
कामानवाप्नुयात्कामी प्रजार्थी प्राप्नुयात्प्रजाम् ॥ ४॥

Dharmaarthee praapnuyaaddharmamarthaarthee chaarthamaapnuyaat
Kaamaanavaapnuyaatkaamee prajaarthee praapnuyaatprajaam

Closing verse 5

भक्तिमान् यः सदोत्थाय शुचिस्तद्गतमानसः ।
सहस्रं वासुदेवस्य नाम्नामेतत्प्रकीर्तयेत् ॥ ५॥

Bhaktimaan yah sadotthaaya shuchistadgatamaanasah
Sahasram vaasudevasya naamnaametatprakeertayet

Closing verse 6

यशः प्राप्नोति विपुलं ज्ञातिप्राधान्यमेव च ।
अचलां श्रियमाप्नोति श्रेयः प्राप्नोत्यनुत्तमम् ॥ ६॥

Yashah praapnoti vipulam jnaatipraadhaanyameva cha
Achalaam shriyamaapnoti shreyah praapnotyanuttamam

Closing verse 7

न भयं क्वचिदाप्नोति वीर्यं तेजश्च विन्दति ।
भवत्यरोगो द्युतिमान्बलरूपगुणान्वितः ॥ ७॥

Na bhayam kvachidaapnoti veeryam tejashcha vindati
Bhavatyarogo dyutimaanbalaroopagunaanvitah

Closing verse 8

रोगार्तो मुच्यते रोगाद्बद्धो मुच्येत बन्धनात् ।
भयान्मुच्येत भीतस्तु मुच्येतापन्न आपदः ॥ ८॥

Rogaarto muchyate rogaadbaddho muchyeta bandhanaat
Bhayaanmuchyeta bheetastu muchyetaapanna aapadah

Closing verse 9

दुर्गाण्यतितरत्याशु पुरुषः पुरुषोत्तमम् ।
स्तुवन्नामसहस्रेण नित्यं भक्तिसमन्वितः ॥ ९॥

Durgaanyatitaratyaashu purushah purushottamam
Stuvannaamasahasrena nityam bhaktisamanvitah

Closing verse 10

वासुदेवाश्रयो मर्त्यो वासुदेवपरायणः ।
सर्वपापविशुद्धात्मा याति ब्रह्म सनातनम् ॥ १०॥

Vaasudevaashrayo martyo vaasudevaparaayanah
Sarvapaapavishuddhaatmaa yaati brahma sanaatanam

Closing verse 11

न वासुदेवभक्तानामशुभं विद्यते क्वचित् ।
जन्ममृत्युजराव्याधिभयं नैवोपजायते ॥ ११॥

Na vaasudevabhaktaanaamashubham vidyate kvachit
Janmamrityujaraavyaadhibhayam naivopajaayate

Closing verse 12

इमं स्तवमधीयानः श्रद्धाभक्तिसमन्वितः ।
युज्येतात्मसुखक्षान्तिश्रीधृतिस्मृतिकीर्तिभिः ॥ १२॥

Imam stavamadheeyaanah shraddhaabhaktisamanvitah
Yujyetaatmasukhakshaantishreedhritismritikeertibhih

Closing verse 13

न क्रोधो न च मात्सर्यं न लोभो नाशुभा मतिः ।
भवन्ति कृतपुण्यानां भक्तानां पुरुषोत्तमे ॥ १३॥

Na krodho na cha maatsaryam na lobho naashubhaa matih
Bhavanti kritapunyaanaam bhaktaanaam purushottame

Closing verse 14

द्यौः सचन्द्रार्कनक्षत्रा खं दिशो भूर्महोदधिः ।
वासुदेवस्य वीर्येण विधृतानि महात्मनः ॥ १४॥

Dyauh sachandraarkanakshatraa kham disho bhoormahodadhih
Vaasudevasya veeryena vidhritaani mahaatmanah

Closing verse 15

ससुरासुरगन्धर्वं सयक्षोरगराक्षसम् ।
जगद्वशे वर्ततेदं कृष्णस्य सचराचरम् ॥ १५॥

Sasuraasuragandharvam sayakshoragaraakshasam
Jagadvashe vartatedam krishnasya sacharaacharam

Closing verse 16

इन्द्रियाणि मनो बुद्धिः सत्त्वं तेजो बलं धृतिः ।
वासुदेवात्मकान्याहुः क्षेत्रं क्षेत्रज्ञ एव च ॥ १६॥

Indriyaani mano buddhih sattvam tejo balam dhritih
Vaasudevaatmakaanyaahuh kshetram kshetrajna eva cha

Closing verse 17

सर्वागमानामाचारः प्रथमं परिकल्प्यते ।
आचारप्रभवो धर्मो धर्मस्य प्रभुरच्युतः ॥ १७॥

Sarvaagamaanaamaachaarah prathamam parikalpyate
Aachaaraprabhavo dharmo dharmasya prabhurachyutah

Closing verse 18

ऋषयः पितरो देवा महाभूतानि धातवः ।
जङ्गमाजङ्गमं चेदं जगन्नारायणोद्भवम् ॥ १८॥

Rishayah pitaro devaa mahaabhootaani dhaatavah
Jangamaajangamam chedam jagannaaraayanodbhavam

Closing verse 19

योगो ज्ञानं तथा साङ्ख्यं विद्याः शिल्पादिकर्म च ।
वेदाः शास्त्राणि विज्ञानमेतत्सर्वं जनार्दनात् ॥ १९॥

Yogo jnaanam tathaa saankhyam vidyaah shilpaadikarma cha
Vedaah shaastraani vijnaanametatsarvam janaardanaat

Closing verse 20

एको विष्णुर्महद्भूतं पृथग्भूतान्यनेकशः ।
त्रींल्लोकान्व्याप्य भूतात्मा भुङ्क्ते विश्वभुगव्ययः ॥ २०॥

Eko vishnurmahadbhootam prithagbhootaanyanekashah
Treenllokaanvyaapya bhootaatmaa bhunkte vishvabhugavyayah

Closing verse 21

इमं स्तवं भगवतो विष्णोर्व्यासेन कीर्तितम् ।
पठेद्य इच्छेत्पुरुषः श्रेयः प्राप्तुं सुखानि च ॥ २१॥

Imam stavam bhagavato vishnorvyaasena keertitam
Pathedya ichchhetpurushah shreyah praaptum sukhaani cha

Closing verse 22

विश्वेश्वरमजं देवं जगतः प्रभुमव्ययम् ।
भजन्ति ये पुष्कराक्षं न ते यान्ति पराभवम् ॥ २२॥

Vishveshvaramajam devam jagatah prabhumavyayam
Bhajanti ye pushkaraaksham na te yaanti paraabhavam

Closing verse 23

अर्जुन उवाच
पद्मपत्रविशालाक्ष पद्मनाभ सुरोत्तम ।
भक्तानामनुरक्तानां त्राता भव जनार्दन ॥ २३॥

Arjuna uvaacha
Padmapatravishaalaaksha padmanaabha surottama
Bhaktaanaamanuraktaanaam traataa bhava janaardana

Closing verse 24

श्रीभगवानुवाच
यो मां नामसहस्रेण स्तोतुमिच्छति पाण्डव ।
सोऽहमेकेन श्लोकेन स्तुत एव न संशयः ॥ २४॥

Shreebhagavaanuvaacha
Yo maam naamasahasrena stotumichchhati paandava
Sohamekena shlokena stuta eva na sanshayah

Closing verse 25

व्यास उवाच
वासनाद्वासुदेवस्य वासितं भुवनत्रयम् ।
सर्वभूतनिवासोऽसि वासुदेव नमोऽस्तु ते ॥ २५॥

Vyaasa uvaacha
Vaasanaadvaasudevasya vaasitam bhuvanatrayam
Sarvabhootanivaasosi vaasudeva namostu te

Closing verse 26

पार्वत्युवाच
केनोपायेन लघुना विष्णोर्नामसहस्रकम् ।
पठ्यते पण्डितैर्नित्यं श्रोतुमिच्छाम्यहं प्रभो ॥ २६॥

Paarvatyuvaacha
Kenopaayena laghunaa vishnornaamasahasrakam
Pathyate panditairnityam shrotumichchhaamyaham prabho

Closing verse 27

ईश्वर उवाच
श्रीरामरामरामेति रमे रामे मनोरमे ।
सहस्रनामतत्तुल्यं रामनाम वरानने ॥ २७॥

Eeshvara uvaacha
Shreeraamaraamaraameti rame raame manorame
Sahasranaamatattulyam raamanaama varaanane

Closing verse 28

ब्रह्मोवाच
नमोऽस्त्वनन्ताय सहस्रमूर्तये
सहस्रपादाक्षिशिरोरुबाहवे ।
सहस्रनाम्ने पुरुषाय शाश्वते
सहस्रकोटियुगधारिणे नमः ॥ २८॥

Brahmovaacha
Namostvanantaaya sahasramoortaye
Sahasrapaadaakshishirorubaahave
Sahasranaamne purushaaya shaashvate
Sahasrakotiyugadhaarine namah

Closing verse 29

सञ्जय उवाच
यत्र योगेश्वरः कृष्णो यत्र पार्थो धनुर्धरः ।
तत्र श्रीर्विजयो भूतिर्ध्रुवा नीतिर्मतिर्मम ॥ २९॥

Sanjaya uvaacha
Yatra yogeshvarah krishno yatra paartho dhanurdharah
Tatra shreervijayo bhootirdhruvaa neetirmatirmama

Closing verse 30

श्रीभगवानुवाच
अनन्याश्चिन्तयन्तो मां ये जनाः पर्युपासते ।
तेषां नित्याभियुक्तानां योगक्षेमं वहाम्यहम् ॥ ३०॥

Shreebhagavaanuvaacha
Ananyaashchintayanto maam ye janaah paryupaasate
Teshaam nityaabhiyuktaanaam yogakshemam vahaamyaham

Closing verse 31

परित्राणाय साधूनां विनाशाय च दुष्कृताम् ।
धर्मसंस्थापनार्थाय सम्भवामि युगे युगे ॥ ३१॥

Paritraanaaya saadhoonaam vinaashaaya cha dushkritaam
Dharmasansthaapanaarthaaya sambhavaami yuge yuge

Closing verse 32

आर्ता विषण्णाः शिथिलाश्च भीता घोरेषु च व्याधिषु वर्तमानाः ।
सङ्कीर्त्य नारायणशब्दमात्रं विमुक्तदुःखाः सुखिनो भवन्ति ॥ ३२॥

Aartaa vishannaah shithilaashcha bheetaa ghoreshu cha vyaadhishu vartamaanaah
Sankeertya naaraayanashabdamaatram vimuktaduhkhaah sukhino bhavanti

Closing verse 33

कायेन वाचा मनसेन्द्रियैर्वा बुद्ध्यात्मना वा प्रकृतेः स्वभावात् ।
करोमि यद्यत् सकलं परस्मै नारायणायेति समर्पयामि ॥ ३३॥

Kaayena vaachaa manasendriyairvaa buddhyaatmanaa vaa prakriteh svabhaavaat
Karomi yadyat sakalam parasmai naaraayanaayeti samarpayaami